Министерот за внатрешни работи Оливер Спасовски денеска се сретна со амбасадорката на Република Германија Кристине Алтхаузер. На средбата, како што информираат од МВР, двајцата соговорници разговараа за улогата на МВР во обезбедувањето фер и кредибилни избори на 11 декември и соработката со Државната изборна комисија и Специјалното јавно обвинителство.
Министерот Спасовски, стои во соопштението, ја информирал амбасадорката Алтхаузер дека МВР ќе направи се што е потребно за да можат граѓаните самостојно да ја донесат својата одлука на 11 декември. Исто така, ја потенцирал решеноста дека нема да дозволи какви било злоупотреби на институцијата од страна на која било политичка партија.
Министерот Спасовски изразил благодарност за досегашната помош и поддршка од страна на Република Германија и изразил надеж дека соработката меѓу Министерството за внатрешни работи на Република Македонија и Сојузното Министерство за внатрешни работи на Сојузна Република Германија ќе продолжи да се одвива во духот на традиционално добрите пријателски односи меѓу двете земји.