Mинистерот за надворешни работи на Република Македонија Никола Попоски е во дводневна работна посета на Брисел, каде што се одржува Деветтиот состанок на Советот за стабилизација и асоцијација меѓу нашата држава и Европската унија.
На состанокот ќе се разговара за билатералните односи помеѓу Македонија и ЕУ во рамките на Процесот за стабилизација и асоцијација, за исполнувањето на политичките и економски критериуми и за хармонизацијата со правото на ЕУ.
Попоски ќе се сретне меѓу другите и со Комесарот за проширување на Европската комисија, Штефан Филе. Освен за развојот од Пристапниот дијалог на високо ниво меѓу Македонија и Европската унија, Попоски и еврокомесарот се очекува да разговараат за очекувањата од пристапот на новата Влада на Грција кон решавањето на проблемот со името со Македонија, како и за најавената посета на генералниот секретар на Обединетите нации, Бан Ки-Мун на Скопје, каде се очекува да дојде со посредникот во преговорите Метју Нимиц.
Со овој состанок ќе претседава министерот за надворешни работи на актуелното Кипарско претседателство со Советот на ЕУ, Ерато Козако Маркулис, во име на Високиот претставник на ЕУ за надворешни работи и безбедносна политика Кетрин Ештон.
Во македонската делегација е и вицепремиерот за европски прашања, Теута Арифи.