Претседателот на СДСМ, Зоран Заев и членката на Извршниот одбор на СДСМ, Рената Дескоска Треневска попладнето се сретнаа со високата комесарка за национални малцинства при мисијата на ОБСЕ, Астрид Торс. Една од темите на состанокот беше актуелната политичка ситуација во Македонија.
На средбата беше констатирано дека забелешките од последниот Извештај на мисијата на ОБСЕ/ОДИХР нотираат сериозни проблеми во изборниот процес, пред се во делот на преклопување на државата и партијата.
Високата комесарка за национални малцинства се интересираше за следните политички чекори на опозицијата, по одлуката за неучество во Парламентот и за решенијата што ги предлага СДСМ за излез од политичката криза.
Претседателот Заев посочи дека системската контрола воспоставена од власта ја узурпира волјата на гласачите и со тоа оневозможува фер и демократски изборен процес и дека е потребно враќање на демократските институции и процеси во државата.
Нормална држава во којашто владеат правото и меѓуетничкиот соживот, се потреба на сите граѓани и во тој правец работи СДСМ како сериозен политички фактор во државата, рече претседателот Заев.
На средбата стана збор и за потребата од развој на меѓуетничките односи во земјава во духот на соживотот и меѓусебно разбирање.