Претседателот на СДСМ, Зоран Заев, денеска се сретна со Хојт Брајан Ји, заменик-помошник на државниот секретар на американскиот Стејт Департмент.
На средбата се зборуваше за актуелната политичка сосојба во земјава и продлабочувањето на кризата со одлуката за аболиција од страна на Горге Иванов.
Претседателот Заев го запозна високиот американски претставник со принципиелните, цврсти ставови на СДСМ за враќање на слободата, демократијата и правдата во Република Македонија.
„Се што рековме се покажа дека е вистината. Очигледно денеска Собранието ќе ја промени одлуката и изборите ќе се одложат. Тоа што беше неможно одеднаш стана возможно. Но, едностраните одлуки, насилното поништување на техничката влада ја усложнуваат длабоката криза и ја загрозуваат иднината на државата. Нема да дозволиме некој да ја држи Македонија во заложништво“ рече претседателот Заев.
За СДСМ, додаде Заев, решенијата може да се бараат во рамки на принципите договорени во Пржино како владеењето на правото, одговорноста и создавањето на сите неопходни услови за слободни, фер и кредибилни избори. Во спротивно, револтот на граѓаните може да ескалира.
„Поништување на одлуката на Иванов за аболиција мора да се случи што поскоро. Основно демократско начело е дека сите граѓани се еднакви пред законите и тоа мора да се обезбеди. Владеењето на правото и исполнување на сите услови за слободни, фер и кредибилни избори се клучни процеси за враќање на правдата, слободата и демократијата во Република Македонија. Само така Македонија може да зачекори во сигурна и подобра иднина за сите граѓани“ рече претседателот Заев.