На денешната средба на претседателот на Собранието на Република Северна Македонија Талат Џафери со романскиот амбасадор Виорел Станила, се потенцираше досегашната пријателска и конструктивна соработка меѓу двете земји.
Во таа насока, соопштија од Собранието, претседателот Џафери се заблагодарил за досегашната голема поддршка што Република Романија и ја даваше на нашата земја на патот кон полноправно членство во НАТО, како и силната и недвосмислена поддршка за добивање на датум за започнување на преговори со ЕУ.
Џафери изразил надеж дека и во иднина оваа поддршка и соработка меѓу двете страни ќе продолжи со ист интензитет.
Романскиот амбасадор му упатил честитки на Џафери за неговиот втор мандат како прв човек на Собранието, изразил задоволство и пофалби за неговата работа како и за целокупната досегашна соработка со романската амбасада.
– Амбасадорот Станила искажа задоволство што конечно на Република Северна Македонија и се отвора можност после три децении, да стане членка на Меѓународната организација Црноморска економска соработка/БСЕК, со која во моментов претседава Република Романија. Претседателот на Собранието го увери својот гостин дека ќе се заложи сите процедури на владино и парламентарно ниво кои се потребни за влез во оваа организација да се завршат до 13 ноември 2020 година, кога во Букурешт треба да биде и приемот на нашата земја во БСЕК, се наведува во соопштението од собраниската прес-служба.
На средбата, соговорниците се согласиле дека ќе ја продолжат меѓусебната соработка на највисоко ниво.