Пожарникари од Македонија и Франција во наредниот период заеднички ќе изведуваат специјални обуки, стручно усовршување и практични вежби со што ќе продолжи континуираната соработка меѓу Територијалната против пожарна единица од Битола со соодветните пожарникарски служби од збратимениот Епинал, но и други француски градови.
На денешниот прием кај градоначалникот Владимир Талески, француските пожарникари посочија дека континуираната соработка со македонските пожарникари датира од 2007 година и била иницирана од нивната амбасада во Република Македонија.
– Пелагонискиот регион често се соочува со шумски пожари и затоа сакаме токму тука да ја пренесеме нашата техника и искуства. Досегашната соработка е на високо ниво, а покажува и резултати и затоа користиме добра основа за да продолжиме понатаму, истакна Лорен Крион, од француската асоција на пожарникари, кој воедно со своите соработници го посети опожарениот планинарски дом „Копанки“.
Градоначалникот Талески истакна дека Општина Битола со конкретни активности ги поддржува идеите и иницијативите на пожарникарите, а од пред неколку месеци формира и посебен Центар за обука на пожарникари.
– За нас од голема полза е француската стручна помош наменета за професионалците и за младите волонтери, но исто така и донираната опрема. Информиран сум дека наскоро од збратимениот град Епинал ќе пристигне нова донација, специјално пожарникарско возило за што одлука веќе донеле тамошните локални власти, истакна Талески.
Градоначалникот на општина Битола Владимир Талески на денешната средба со новинарите потврди дека го прифатил барањето на планинарското друштво „Пелистер“, сопственик на планинарскиот дом „Копанки“ заеднички и програмски да се помогне во санацијата и враќањето на планинарскиот дом на вљубениците на природата на Баба Планина.