Претседателката на ДОМ Лилјана Поповска и носителите на листите за советници од Град Скопје – Денко Скаловски, на Бутел – Златко Јордановски и на Гази Баба – Мирослав Богдановски денеска имаа средба со претставник на „Макстил“ АД во врска со индустриското загадување од овој капацитет.
Средбата, како што се наведува во соопштението од ДОМ, беше одржана по поплаките на граѓаните на Бутел и Гази Баба кои се однесуваат на испуштањето на облаци од чад кои потекнуваат од кругот на Железарницата.
Одговорните во „Макстил“ информирале дека претпријатието не работи веќе три месеци, а ист одговор минатата недела од ДОМ добиле и при посетата на „Скопски легури“ , при што се наметнува потребата од изработка на катастар на загадувачи во кругот на поранешната Железарница за да се регистрираат „Фантомските“ загадувачи.
– ДОМ е категорично против пролонгирањето на роковите за примена на еколошките стандарди до 2019 година што ќе значи дополнителни 6 години загадување, и се залагаме за замена на македонските еколошки стандарди со европските, се вели во соопштението од ДОМ.
Од ДОМ предлагаат државата да им помогне на големите загадувачи преку таканаречени меки кредити кои, според нив, не ги иззема вложувањата од страна на соодветните субјекти.
