Реформската агенда во правосудството, измените на законите кои следуваат во наредниот период, од кои се очекува да ја зајакнат и гарантираат независноста, самостојноста и непристрасноста на судството, како и реформите за борбата со корупцијата, беа теми на денешната средба меѓу министерката за правда Рената Дескоска и делегација од Министерството за правда и безбедност на Кралството Холандија.
Делегацијата ја предводеше Арјен Таселар, раководител за меѓународна соработка и проекти, и Ханс Јонкир, одговорен за координирање на политиките за меѓународна соработка, а на средбата присуствуваше и амбасадорот на Холандија, Вилем Ваутер Пломп.
– Целите на реформите, кореспондираат и произлегоа од оценките на Европската комисија во извештаите за напредокот на Република Македонија во последните години, а опфатени се и препораки од бројни меѓународни извештаи кои се однесуваат на реформи во правосудството, како Итните реформски приоритети (Извештајот на Прибе), извештаите на ГРЕКО и CEPEJ, Мислење на Венецијанска комисија и бројни други домашни извештаи, информираше министерката Дескоска на средбата.
Како што соопшти Министерството за правда, таа потенцираше дека квалитетот на реформите нема да биде предмет на компромис и истакна дека очекува поддршка од сите партии во Собранието во делот на реформите за владеење на правото, поради придобивките кои од нив се очекуваат за граѓаните и иднината на земјата.