Отворената и јасна чешка поддршка за нашиот евроинтегративен пат е поддршка за сигурноста, стабилноста и просперитетот на целиот регион, изјави денеска вицепремиерот задолжен за европски пршања, Никола Димитров на средба со амбасадорот на Чешка во земјава, Мирослав Томан.
– Благодарни сме на Чешка и на Вишеградската група за нивната ангажираност Западниот Балкан да биде дел од европското семејство, истакна Димитров.
Како што соопшти Секретаријатот за европски прашања, на средбата на која беа реафирмирани одличните билатерални односи и силната поддршка за нашата европска иднина, Димитров се заблагодари и за помошта добиена во контекст на пандемијата и беа разгледани можностите за заеднички пристап во борбата против социо-економските последици.
– Соговорниците за време на средбата се осврнаа и на исполнувањето на реформската европска агенда на земјава, заеднички беше констатирано дека Северна Македонија оствари значителен напредок во спроведување на потребните реформи и унапредување на добрососедските односи, што беше нотирано и во неодамнешниот Извештај на Европската комисија, се наведува во соопштението на СЕП.