Македонските царински службеници на граничниот премин Деве Баир спречија шверц на метамфетамин.
Како што соопшти Царинската управа, на 20-ти овој месец во 19:50 часот, на граничниот премин Деве Баир за влез во Република Македонија е пријавено патничко моторно возило со македонски регистарски таблички, управувано од возачот Р.Б. и совозач Ј.Л. и двајцата македонски државјани. Откако Ј.Л. било селектиран за претрес, од страна на царинските службеници е упатено кон просторија во која се врши личен претрес. Пред да влезе во просторијата, осомничениот во еден момент се исплашил и од левиот џеб од неговата тренерка фрлил проѕирно најлонско ќесе на подот пред влезната врата од зградата, во кое царинските службеници пронајдоа 96 парчиња таблети со жолтеникава боја и непознат состав, на кои била втисната ознака ,,М”.
Според извршеното вештачење во МВР-Одделот за криминалистичка техника, таблетите претставуваат психотропна супстанца метамфетамин која делува на централниот нервен систем и е класифицирана во листа на забранети опојни дроги и психотропни супстанци.
Против сторителите, Царинската управа поднесе кривична пријава за сторено кривично дело „неовластено производство и пуштање во промет на наркотични дроги психотропни супстанции и прекурсори“ до надлежното Јавно обвинителство во Куманово.
Судијата при надележниот Основен суд Куманово, на претходна постапка на осомничениот Ј.Л му одреди притвор во траење од 30 дена додека на Р.Б одредени му се мерки на претпазливост – обврска да се јавува во просториите на Основниот суд Куманово како и привремено одземање на патна исправа.