На новинарско прашање дали во услови кога се прогласува вонредна состојба се контролира границата со Косово зашто, наводно, во кумановско Черкези има 20 камиони со десетици тони товар пченица од Косово, премиерот Оливер Спасовски одговори дека ќе ја провери информацијата и дали случајот е законски. Притоа нагласи дека и со прогласување вонредна состојба, животот не престанува и ќе продолжи понатаму.
-Наша идеја е што повеќе да функционира стопанството, но да бидеме ригидни и рестриктивни во однос на заштита на здравјето, рече Спасовски на прес-конференцијата посветена на членството во НАТО.
На прашањето како ќе работат вработените во компании на смени или тие што се во услужниот сектор 24 часа доколку се ограничи движењето, Спасовски додаде дека не би сакал да дава одговори на претпоставени прашања зашто такви, рече, може да има милион.
-И на претходниот пред информирав дека за секоја одлука која ќе ја носиме поврзана со вонредна состојба ќе ја информраме јавноста и врз основа на тоа ќе биде многу јасно кој и што треба да прави доколку се донесе каква било одлука. Сите тие одлуки ќе зависат многу од тоа како сите заедно се однесуваме. Ако ги следиме препораките и ги почитуваме и ако заштитата ни е пред сè, тогаш ќе поминеме сите многу полесно. Ако не, тогаш ќе треба да имаме рестриктивни мерки за кои навремено и ќе информираме, додаде Спасовски.