Завршивме со координацијата за денес, нема поместување во однос на деблокирањето на институциите. Побаравме да продолжи седницата со 67 потписи од пратеници, рече генералниот секретар на СДСМ и пратеник Оливер Спасовски.
Тој кажа дека откако прифатиле ВМРО-ДПМНЕ да има 6 члена во комисијата за избори и именување, партијата на Никола Груевски побарала да има претседател во комисијата.
– ВМРО-ДПМНЕ ја опструира Македонија. Не сака да функционира Собранието со цел да си ги зачуваат сопствените места, рече Спасовски.
Тој објасни дека Собранието бира кој ќе биде претседател, кој заменик претседател, а кој ќе бидат членови во комисијата, онака како што е пропишано во деловникот.
Спасовски најави дека утре на пладне ќе продолжи координацијата со екс-претседателот на Собранието, Трајко Вељаноски.