Ништо не се крие во случајот со полицајката, изјави денеска министерот за внатрешни работи, Оливер Спасовски, одговарајќи на новинарско прашање во Кавадарци.
„Поднесена е целокупната документација до јавното обвинителство, тоа постапува и сите информации што се однесуваат на случајот ги имате таму. Тие податоци ќе ги добиете од Јавниот обвинител. Значи, се што имавме како материјал и како доказ е доставено до обвинителството и во рамките на истаргата која се води, сите информации можат да се најдат само во обвинителството“, рече Спасовски.
Инцидентот со полицајката, се случи во минатиот четврток при нејзин обид заедно со вработени од „Градски паркинг“ да го кренат непрописно паркираниот автомобил на функционерот на ДУИ, Бекир Асани, по што тој ја нападнал полициската службеничка. МВР и Јаначковска тврдат дека таа била само вербално нападната, а непосредно по нападот завршила во болница бидејќи си ја удрила раката од пајак-возилото. Вчера Јаначкова даваше изјава во Јавното обвинителство кое неделава отвори истрага за овој случај.