Потпишување на договори за размена на податоци и информации при спречување на тероризмот и насилниот екстремизам е новата иницијатива која денеска ја договориле министерите за внатрешни работи на Македонија и Унгарија, Оливер Спасовски и Шандор Пинтер, кој се наоѓа во посета на Македонија.
По средбата во МВР, Спасовски рече дека Унгарија несебично и помогна на македонската полиција во справување со мигрантската криза и потсети дека унгарските колеги до сега испратиле над 600 службеници кои заедно со нашите полицајци ја обезбедуваат границата со Грција, а со тоа помагаат во безбедноста не само за нашата држава, туку и за регионот и ЕУ.
Спасовски информираше дека веќе во целост се договорени сите постапки за потпишување на договорот за полициска соработка меѓу Македонија и Унгарија и дека во скоро време овој договор ќе биде ратификуван.
Унгарскиот министер за внатрешни работи ја потенцираше важноста на улогата на македонските полицајци кои ја обезбедуваат границата со Грција во однос на мигранската рута и порача дека Унгарија и натаму ќе дава поддршка во однос на материјални и технички средства, но и во човечки ресурси.
Пинтер рече дека ќе се почитуваат правата на мигрантите но и дека нема да се дозволи да се загрози бебедноста на регионот.