Подготвеност за продлабочување на соработката, особено во областа на организираниот криминал и финансиските истраги изразија на денешната средба во Трст министрите за внатрешни работи на Македонија и Италија, Оливер Спасовски и Марко Минити.
Тие ја потенцираа одличната соработка меѓу двете министерства, која како што потенцираа се одвива во духот на традиционално добрите пријателски односи меѓу двете земји.
На средбата, како што соопшти МВР, е ставен акцент на соработката во областа на борбата против дрога, а во таа смисла претставници од македонското МВР присуствуваат на обуки за борба против трговија со дрога, главно во Централната дирекција за борба против дрога во Рим.
Минити ја потенцираше безрезервната поддршка од Италија за реформите во Македонија.
Министерот Спасовски вчера и денеска учествува на Завршната министерската конференција за проектот „Борба против организираниот криминал: Меѓународна соработка во кривичното право“, која се одржува во Трст.