Собранието на Република Македонија на денешното продолжение на шестата седница го избра Спасе Глигоров за директор на Агенцијата за администрација. Глигоров е избран со 61 глас за и еден воздржан, без присуство на пратениците на опозицијата.
Заменик-министерот за информатичко општество Александар Бајдевски вчера истакна дека Глигоров ги исполнува сите законски услови и оти професионално и одговорно ќе ги извршува работните обврски. Според пратениците од опозицијата, изборот на Глигоров е незаконски и со него, како што посочија, се потврдува оти СДСМ врши целосна партизација на администрацијата.
Собранието ја почна расправата по Предлог одлуката за давање согласност на општите акти на Народниот правобранител, која ја образложи омбудсманот Иџет Мемети.
Во контекст на тоа посочи дека новиот Закон за Народниот правобранител не ги оствари во целост потребите за финансиска независност на оваа инситуцијата, ниту во него беа вградени препораките на Прибе. Според тоа, како што додаде, неопходно е да се направат измени и пратениците да ги поддржат општите акти.
Мемети рече дека во Извештајот на Прибе имало неколку клучни препораки што ќе овозможат подобрување на работата на институцијата Народен правобранител, а кои не биле внесени со последните измени на законот.
Една од клучните препораки било воведување казни за тие што ја попречуваат работата на народниот правобранител, но и формирање ад хок анкетни комисии за предмети и случаи што би ги покренувала оваа институција.
Мемети додаде дека Македонија се уште од формално-правен аспект нема создадено услови да има национална институција Народен правобранител која ќе работи со полн капацитет за промоција и заштита на човековите слободи и права.
– Се додека не се извршат измени во клучните закони, како што се Законот за вработување во јавните служби, Законот за административни службеници… не сме ја завршиле работата, нагласи Мемети.
Пратеникот од ВМРО-ДПМНЕ Илија Димовски по обраќањето на Мемети побара пауза од еден час за да ги разгледаат стенограмите од говорот. Претседателот на Собранието на РМ Талат Џафери даде пауза по која треба да продолжи седницата.