Советничката група на СДСМ поднесе барање до Советот на општината на Дојран за дополнување на референдумското прашање на итна и вонредна седница.
Во дописот наведуваат дека се бара “измена и дополнување на Одлуката за распишување референдум на локално ниво донесена на 19 јуни со второ референдумско прашање кое гласи:
Дали сте ЗА или ПРОТИВ продолжување со работа на рудникот и рударскиот комплекс за металични суровини Казандол“
Советот на Општина Дојран одлучи референдум да се одржи на 23 јули, кога жителите ќе се изјаснат дали се “за“ или “против“ отворање на рудници на територијата на општината. Советниците беа со став тоа да биде единствено референдумско прашање, бидејќи според нив тоа е сеопфатно и нема потреба да се изјаснуваат за стопирање на рудникот „Казандол“ во соседната општина Вландово, но сепак со ваквото прашање не е до крај јасно дали се однесува и за Казандол.
Првично, референдумот во Дојран требаше да се одржи на 18 јуни, но одлуката на Советот за негово спроведување не ја потпиша градоначалникот Борче Стамов затоа што како што беше кажано, во тој момент не му бил продолжен мандатот.