Предлог буџетот на општина Гостивар за 2018 година не помина на продолжението на прекинатата седница. Предлагачот, градоначалникот на општината го повлече и побара од советнциите сите забелешки и предлози да ги достават до петок на пладне. Одлука дојде откако на самиот почеток, советниците почнаа да изнесуваат предлози за пренамена на средства и без конструктивна дебата.
Ваков е исходот по двочасовната дебата во продолжението на седницата која минатиот понеделник беше прекината. Откако точката со предлог буџетот беше тргната од дневниот ред, претседателот на советот даде пауза и се очекува да да се продолжи со работа во доцните попладневни часови и вечер, со оглед дека на дневен ред се 44 точки.
На оваа седница ѝ претходеа координативни средби за да се најде начин и да се избегнат последиците од неизгласување на буџетот, но на површина излегоа партиските спротивставувања.
Буџетот е проектиран на 16,8 милиони евра и пред десет дена за прв пат беше ставен на седница. Тој сè уште не е изгласан откако дојде до прегуприрање и политичките поделби помеѓу мнозинството предводено од ДУИ и СДСМ од една, и општинската администрација со која раководи градоначалникот кој доаѓа од редовите на Алијансата за Албанците.
Заради ова, локалната самоуправа времено се финасира, а имаше проблеми и со исплатата на вработените во образованието и администрацијата.
Доколку до крајот на март не биде изгласан овој финасиски документ, може да дојде распуштање на советот и распишување на нови избори за членови на советот.