18-годишен возач од селото Опае ја предизвикал денешната страотна сообраќајна несреќа во Куманово, кога возејќи со голема брзина, ја загубил контролата врз својот „Опел Зефира“ и удрил во три паркирани возила во населбата Бедиње, при што автомобилот заврши превртен на покривот.
Возачот со иницијали С.И. е повреден и пренесен во Ургентен центар Куманово во сообраќајната несреќа што се случи околу 17 часот на улицата „11 Ноември“, а една од удрените паркирани коли заврши заглавена во оградата на таканаречениот „Бедински мост“.
„Возачот С.И.(18) од село Опае кој управувал патничко моторно возило „Опел Зефира“ со кумановски регистарски ознаки изгубил контрола на возилото и удрил во три паркирани возила. По незгодата возачот С.И. бил пренесен во Ургентен Центар, Куманово, а по укажаната лекарска помош му биле констатирани телесни повреди“, соопштија од СВР Куманово, додавајќи дека извршиле увид на местото на несреќата.