Собранието на Репбулика Македонија по точките од дневниот ред на 12 седница ќе продолжи да работи по 20 часот, откако по дадената пауза, продолжија со реплики и контрареплики по измените на Законот за медицински студии и континуираното стручно усовршување на докторите.
Пратениците не го прифатија предлогот на претседателот на Собранието на РМ Талат Џафери да се откажат од расправата и да се премине на гласање.
Опозицијата истакна дека биле конструктивни и дека се согласиле да се држат до договореното, но оти тоа било прекршено од страна на пратеници од мнозинството.
Драган Цуклев од ВМРО-ДПМНЕ посочи дека ќе може да продолжат со работа по едночасовна пауза што ја побара, но претходно да се извини Јагода Шахпаска од СДСМ за критиките упатени кон нејзина колешка докторка, а доколку тоа не го направи таа, координаторот на пратеничката група да излезе и да се огради од тоа.
Претседателот на Собранието Талат Џафери им посочи на пратениците дека сите зборуваат за Денот на демократијата, но дека од однесувањето нема ни „Д“ од демократијата. Им даде пауза на пратениците, но поради протколарно обврски во Парламентот по повод Денот на демократијата, соопшти дека седницата ќе продолжи во 20 часот.