Делегација на Собранието на Република Македонија ќе учествува на 12. состанок на Мешовитиот парламентарен комитет-Република Македонија и Европска унија што денеска и утре ќе се одржи во Европскиот парламент во Стразбур.
На 12. состанок се очекува да бидат разгледани повеќе прашања во врска со односите меѓу Македонија и ЕУ, актуелната политичка ситуација во државата по одржаните предвремени избори во 2014, владеењето на правото, реформите во судството и јавната администрација, борбата против корупцијата, потоа за слободата на изразување и медиумите, економските и финансиските случувања, како и за добрососедските односи и регионалната соработка во контекст на ПСЈИЕ.
Во македонската собраниска делегација се пратеникот Кенан Хасипи, како претседател на делегацијата на Собранието на Република Македонија во Парламентарниот комитет за стабилизација и асоцијација (ко-претседавач на овој комитет), пратеникот Артан Груби, потпретседател на делегацијата (заменик ко-претседавач на комитетот), пратениците Антонио Милошоски, Силвана Бонева, Владимир Ѓорчев, како членови и пратеникот Беким Фазлиу, заменик-член на делегацијата.
Се очекува на состанокот обраќање да има и вицепремиерот задолжен за евроинтеграции Фатмир Бесим.
Дванаесеттиот состанок на Мешовитиот комитет се одржува согласно Спогодбата за асоцијација и стабилизација на Република Македонија и Европската унија и според Деловникот на Мешовитиот парламентарен комитет-Република Македонија и Европска унија.