Собранието на утрешната седница ќе го разгледа предлогот на пратеникот на ВМРО-ДПМНЕ, Антонијо Милошоски за објавување јавен оглас за избор на нови членови на ДИК. На утрешната 34-седница на Собранието, која што е закажана за во 12 часот, предлог одлуката за објавување на претседател, потпретседател и шест членови на ДИК е втора точка на дневниот ред.
Пратеникот на ВМРО-ДПМНЕ на почетокот на февруари испрати барање до претседателот на Собранието Талат Џафери за итно распишување на оглас за избор на нови членови на Државната изборна комисија.
Според предлагачот, итноста од објавување оглас за избор на нови членови на ДИК е со цел комплетирање на составот на ДИК, откако претходните членови поднесоа оставки по скандалот со делење бонуси за изборите.