Денеска истекуваат уставните 6 месеци од верификацијата на 34 -те мандати на пратениците од опозицијата од страна на Собранието, или рокот во кој треба да седнат во пратеничките клупи. Во спротивно се соочуваат со постапка за одземање на мандатите.
Но дали ќе се повлече овој чекор се уште е неизвесно, иако Вељаноски, според Деловникот и законите ова не може да го одолговлекува. Неоправдано отсуство подолго од шест месеци, согласно одредбите предвидува постапка за одземање на мандатот на пратеник.
Но, дали ќе дојде до оваа постапка сеуште никој со сигурност не потврдува. Собраниски извори велат дека најверојатно ќе се користат сите механизми за дополнително одложување на оваа процедура.
Власта, според наши извори, тактизира со одземањето на мандати – се чека исход од евентуалните преговори Груевски – Заев на што инсистира и меѓународната заедница.
Само три пратенички од 34-те народни избраници се вклучија во работата на Собранието и се спротиставија на ставот на опозицијата за бојкот на Парламентот. Не се знае дали и колку пратеници од опозицијата ќе дојдат на денешната закажана седница на Собранието. СДСМ и помалите опозициски партии пред неколку дена повторно се изјаснија дека не се враќаат во Парламентот.
Претседателот на Собранието Вељаноски, по добивањето на евиденцијата, се очекува да побара заклучок од Комисијата за мандатно – имунитетни прашања за отсуствата, по што треба да следува изјаснување на Собранието. Мандат на пратеник може да се одземе со двотретинско мнозинство.
ВМРО-ДПМНЕ не се изјаснува како ќе гласа, а ДУИ најави дека ќе гласа против одземање на мандатите на опозицијата.