Собранието прокиснува.
Попушти покривот на Салата на владата и го поплавил подот. Фотографиите се направени во прес центарот .
Собранискиот покрив попуштил поради обилниот дожд. Со месеци трае реновирањето на покривот, кој се докажа како неотпорен на дожд. Со кофи и крпи собранието се бранеше од дождовните капки кои продираа низ таванот.
Пратениците и гостите за да не седат со чадори, беа преместени во други сали, бидејќи прокисна во салата на Влада, која се наоѓа на приземјето.
Вработени се жалат дека исто е и во други простории, но никој не сака јавно да проговори. На снимателите не им беше дозволено ова да го регистрираат. Но, спикерот Трајко Вељаноски нема да бара одговорност за нечија несовесност во работата , иако 240 милиони денари, пари од народот се одвоени за реновирање на зградата на Парламентот.
Пари нема за пратениците за патни и дневни трошоци, она што им е законски загарантирано. Веќе 6 месеци доцни исплатата а потрошени се сите 70 милиони денари, наменети за оваа потреба.
Дека нешто не фунционира на релација Собрание-Заеднички служби на Влада покажува и фактот дека наместо службени возила, за официјални високи гости на Законодавниот дом се зема Рент-а-кар возила.
Од Владата велат дека Собранието е должник и за услугите на собраниското бифе, каде веќе освен јајца во неколку варијанти, не може да се добие речиси ништо за јадење.Сите се снаоѓаат како знаат и умеат, а интензивна работа се најавува и за наредниот период.
Маратонската дебата за законот за бранители и за буџетот продолжува, на 18-ти претседателот Ѓорге Иванов ќе го има редовното годишно обраќање, и на крајот на календарската 2012 , пратениците ќе ја испрашуваат Владата.
По Нова година претседателот Трајко Вељаноски ќе ги распише локалните избори.