Собранието на Република Македонија попладнево во рамки на 12. седница ги прифати во прво читање предлог-измените на Законот за сметководство за буџетите и буџетските корисници и на Законот за издавање на обврзници на Република Македонија за денационализација.
Координаторот на пратеничката група на ВМРО-ДПМНЕ Илија Димовски рече дека ќе гласаат за предлог-законските измени, но оти очекуваат во текот на следната недела и пратениците од мнозинството да го дадат својот глас за предлог-законите поднесени од страна на ВМРО-ДПМНЕ кои, како што рече, се важни за граѓаните.
На почетокот на седницата, Димовски реагираше на работата на претседателот на собраниската Комисија за европски прашања Артан Груби и на чинот на гласање по Предлог-законот за употреба на јазиците. Обвини дека е прекршена процедурата на гласање и злоупотребена е функцијата претседател на Комисијата од страна на Артан Груби. Според Димовски, не било прифатено барањето на пратеникот Антонио Милошовски да се гласа поединечно по Предлог-законот.
– На пратениците од коалицијата „За подобра Македонија“ и од ВМРО-ДПМНЕ не им беше дозволено воопшто да се произнесат дали се „за“, „против“ или воздржани. Затоа, замолувам Собранието или Вие да се обратите до Артан Групи и да му посочите дека такви постапки со погазување на можноста на пратениците да се произнесат, не му одговараат ниту на Собранието, ниту на било кој друг, рече Димовски.
Претседателот на Собранието, Талат Џафери појасни дека претседателот на Комисијата за европски прашања постапил согласно Деловникот за работа.
– Деловникот на Собранието санкционира поединечно гласање на пленарна седница доколку разликата меѓу „за“ и „против“ е до пет гласа. Таква можност не се дава на работните тела во Собранието, рече Џафери.