Собранието денеска ќе ја одржи 28. седница на која треба да одлучува за одземање на мандатите на пратениците од опозицијата.
За да му биде одземен мандат на пратеник потребно е двотретинско мнозинство односно 82 гласа. За секој мандат Собранието треба поединечно да се изјасни.
Комисија за деловничко и мандатно-имунитетни прашања на седницата одржана на 2 декември реши да му предложи на Собранието одземање на мандатите на 31 пратеник од опозициската СДСМ и нејзините коалициски партнери, врз основа на извештај за отсуствата на пратениците од овој состав за период од шест месеци, изготвен од генералниот секретар на Собранието.
Врз основа на Извештајот утврдено е дека во периодот од 10 мај до 10 ноември, 31 пратеник не присуствувале, не учествувале, ниту пак го известиле претседателот на Собранието дека оправдано ќе отсуствуваат од 40 седници.
Пратениците од опозицијата, со исклучок на три пратенички, по вонредните парламентарни избори донесоа одлука да не учествуваат во работата на Парламентот. Тие поднесоа оставки, но собраниската седница за нивно прифаќање беше прекината.
Се уште не се знае дали денеска ќе им бидат одземени мандатите на пратениците од опозицијата бидејќи владејачките партии не се изјаснуваат во јавноста за текот на седницата и како ќе се изјаснат.
Лидерот на ДУИ Али Ахмети вчера уште еднаш ги повика опозиционерите да се вратат во Парламентот по примерот на опозицијата во Албанија.
– Ние не го гледаме решението доколку им го одземеме мандатот на нашите колеги пратеници. Овој мандат не го регулира прашањето туку нивното враќање во Собранието отвора пат за дијалог. Не еднаш сум кажал дека за добри идеи тие имаат партнер во ДУИ, рече Ахмети.