Во Собранието на Република Македонија за денеска напладне е закажано петтото продолжение на 80-тата седница. Пратениците треба да гласаат по два предлог-закона за дополнување на Законот за енергетика во прво читање – едниот поднесен од пратеничките групи на СДСМ, НСДП и ЛДП, а вториот од пратениците Павле Трајанов и Лилјана Поповска.
Расправата по предлозите заврши вчера попладне. Се бара укинување на обврската исклучените од парно да плаќаат фиксен надомест за ангажирана моќност.
На дневен ред на 80-тата седницата се и: Предлог на закон за изменување и дополнување на Законот за Академијата за судии и јавни обвинители, Предлог на закон за дополнување на Законот за платите на судиите и Предлог на закон за изменување и дополнување на Законот за платите на јавните обвинители – сите по скратена постапка.
Во Парламентот денеска седници ќе одржат и пет комисии – за образование, наука и спорт, за политички систем и односи меѓу заедниците, за економски прашања, за труд и социјална политика и Законодавно-правната комисија.