Собранието на Република Македонија денеска ќе ја продолжи 55. седница на која пратениците треба да гласаат за измените и дополнувањата на Кривичниот законик, законите за домување, за просторно и урбанистичко планирање и за пожарникарството, како и за предлог-законот за катастар на недвижности, сите во прво читање.
Пратениците ќе расправаат и за Стратегија за родова еднаквост 2013-2020, Годишниот извештај за работата на Агенцијата за електронски комуникации за 2012 година, Предлог-одлуката за одобрување на Годишната програма за работа на Агенцијата за пошти за 2013 година, Финансискиот план на Агенцијата за супервизија на осигурување за 2013 година, Финансискиот план на Агенцијата за супервизија на капитално финансирано пензиско осигурување за 2013 година, Предлог-одлуката за давање согласност на Одлуката за утврдување на висината на надоместоците што ги наплатува Агенцијата за супервизија на капитално финансирано пензиско осигурување од пензиските друштва и Предлог-одлуката за давање согласност на Одлуката за висината на месечниот надомест што го наплатува Агенцијата за супервизија на капитално финансирано пензиско осигурување од пензиските друштва за 2013 година.
На дневен ред на седницата се и Годишниот финансиски план на Јавното претпријатие Македонска радио-телевизија за 2013 година, Предлог-одлуката за одобрување на Финансискиот план на Јавното претпријатие Македонска радио-телевизија за редовни и инвестициони активности на радио програмите наменети за соседните земји и Европа на странски јазици за 2013 година, Предлог-одлуката за одобрување на Финансискиот план на Јавното претпријатие Македонска радио-телевизија за редовни и инвестициони активности на радио програмите наменети за информирање на иселениците и граѓаните на Република Македонија кои живеат во соседните земји, во Европа и на другите континенти на македонски јазик и на јазикот што го зборуваат најмалку 20% од граѓаните кој е различен од македонскиот јазик и на другите немнозински заедници за 2013 година.