Собранието на Република Македонија денеска ќе ја продолжи 35. седница на која треба да почне расправата за измените и дополнувањата на Законот за кривична постапка.
На дневен ред на оваа седница се и Предлогот на закон за изменување на Законот за судовите во прво читање, како и дополнувањето на Законот за Комитетот за односи меѓу заедниците и за Предлогот на закон за дополнување на Законот за определување на имиња на улици, плоштади, мостови и на други инфраструктурни објекти, поднесени од пратениците Изет Зеќири и Фламуре Демири – Креци.
Собранието ќе ги разгледа и дополнувањата на Законот за локалната самоуправа и измените и дополнувањата на Законот за Градот Скопје, поднесени од Лилјана Поповска, како и Предлогот на закон за изменување на Законот за слободен пристап до информации од јавен карактер и Предлогот на закон за Центар за обука на службеници, поднесени од група пратеници од опозицијата.
На дневен ред на 35. седница е и информација за трошењето народни пари за проектот „Скопје 2014“ поднесена од опозицијата.