Синдикатот на одбраната и безбедноста (СОБ) денеска обвини дека Министерството за одбрана го спречува нормалното функционирање на синдикатот и го крши колективниот договор согласно кој е должен да ја уплатува членарината на сметка на синдикатот.
Претседателот на СОБ, Ристо Ајтов на прес-конференција соопшти дека Министерството за одбрана ја нема уплатено членарината за мај на сметката на синдикатот, иако таа редовно се исплатувала во изминатите 20 години.
– Поради кражбата на синдикалната чланарина, СОБ ќе покрене кривична пријава за злоупотреба на службената должност против сите вработени во МО кои учествувале во истата, како и постапка за надомест на штета пред надлежните судски органи, рече Ајтов.
Во однос на новоформираниот синдикат на одбраната и безбедносните сили (СОБС), Ајтов изрази сомневање дека целата работа е направена за да се уништи СОБ од страна на раководството на Министерството за одбрана и одредени лица во Министерството за труд и социјална политика.
Синдикатот на одбраната и безбедноста во соработка со Независниот синдикат на професионални војници најавија и активирање на барањата за зголемување на платите во одбраната за 20 проценти, зголемување на дневниците и подобрување на условите за работа.
Според синдикатите, припадниците на АРМ користат стари униформи и опрема, а како неуспешен го посочуваат и проектот „АРМ – мој вистински дом“ поради, како што посочија, високата цена на чинење.