Лицето З.Р.(76) од село Добарце, општина Желино вчера пријавил во тетовската полиција дека непознато лице го измамило и му зело околу 450 евра, информираше денеска портпаролот на СВР Тетово, Марјан Јосифовски.
Според пријавата на оштетениот, вчера околу 9 часот тој излегол од банката „Вестерн унион“ од каде подигнал 450 евра. Потоа седнал на клупа во близина на Центарот за култура „Иљо Антески-Смок“ каде му пришол непознатиот, кој почнал разговор и му рекол на старецот дека ги познава неговиот син и блиските, кои се на печалба во Италија, по што се понудил да му помогне за менување на еврата.
– Штом старецот ги извадил парите, непознатиот брзо му ги зел од рака и му рекол да почека малку, по што заминал и не се вратил. Отако увидел дека е измамем и дрско ограбен З.Р., по околу половина час од настанот, го пријавил случајот. Се преземаат мерки за идентификување на сторителот и негово приведување, изјави Јосифовски.
Тој посочи дека во последно време има зголемен број на вакви случаи на измами при што главна цел се пред се повозрасни лица.