Неколку денови по ред, во Скопје не се излегува надвор -во воздухот повторно има високи концентрации на опасни честички. Проблемот како и секоја зима, остана и оваа, без никакво решение.
Денеска Скопје е трет град по загаденост во светот, веднаш по Лахор во Пакистан и Делхи во Индија. Ваквата ситуација трае со денови, но не ги алармира ниту зелените, ниту пак тие што претставуваат зелени агенди цела година.
Од скопските општини најлош е воздухот во Карпош, Центар, Лисиче и Гази Баба каде загадувањето достигнува над 400 ПМ 10 честички. Аерозагадувањето не само што само по себе претставува голема опасност, туку и според лекарите, дополнително го олеснува патот на вирусите до белите дробови.
Загадувањето на воздухот стана најголема закана за здравјето на луѓето кои живеат во Скопје, а ситуацијата се влошува со години, наместо да се најде решение. Според досегашните анализи, една од главните причини за енормното загадување е греењето на домаќинствата, со придонес од најмалку 32% во вкупните штетни емисии. Во текот на зимските месеци, според мониторинг станиците на Министерството за животна средина и просторно планирање штетните честички на PM 10 се околу десет пати повисоки од максимално дозволените концентрации според националното законодавство.
Македонија е и на 17 место во светот како најзагадена држава во текот на целата година. Од регионот пред нас е само Босна И Херцеговина која се наоѓа на 10 место.