Воведување функција градски архитект и градски совет на архитекти, донесување зелен катастар и воспоставување кластер за зелен град, се дел од проектите кои ги промовира денеска носителот на зелената советничка листа на ДОМ Денко Скаловски.
Тој укажа и на потребата од донесување закон за зеленило во Собранието, што го иницира ДОМ минатата година.
Зелениот катастар, појасни, е проект за евиденција и заштита на постојните зелени површини во Скопје преку кој ДОМ ја искажува категоричната заложба за зголемувањето на зелените површини (дрвореди, паркови) по глава на жител. Со воведување на функцијата градски архитект, пак, ќе се овозможи носење урбанистички решенија во Скопје, кои ќе бидат по мерка на неговите граѓани, рече Скаловски, истакнувајќи дека преку зелените проекти што ги нуди ДОМ се залага за зелено Скопје.
ДОМ најави дека преку Советот на Град Скопје ќе работи и на замена на сегашниот јавен транспорт со поекономични и еколошки поодржливи превозни средства во градот, намалување на емисиите на јаглерод диоксид за 20 проценти до 2020, одржливо управување со отпадот, дислокација на старите депонии со опасен отпад од напуштените и активните индустриски капацитети, задолжително еколошко образование во основното и средното образование. Ветуваат и реконструкција на сите училишта заради зголемување на енергетската ефикасност, отворање зелени работни места, посебно во индустријата и намалување на невработеноста преку нив.