ЈЗУ Центар за јавно здравје-Битола со три тимови почна со превентивна систематска дезинсекција на територијата на општините Битола, Новаци и Могила.
Уништувањето на комарците ќе се врши во периодот од 19 часот до 2 часот по полноќ со апаратура за УЛВ ладно запрашување поставена на пикап-возило.
Со дезинсекцијата се опфатени зелените површини на целото градското подрачје и периферијата на градот, предвидени со оперативниот план и програма доставени до општина Битола. Во општина Новаци ќе бидат опфатени зелените површини, подрачјата по течението на река Црна, подрачјата околу каналниот систем, локалитети со застојни водени површини, урбани населби и локалитети, а во општина Могила зелените површини, подрачјата по течението на реки, водотоци, подрачјата околу каналниот систем и локалитети со застојни водени површини.
Од ЈЗУ Центар за јавно здравје-Битола информираат дека првата фаза од систематската дезинсекција во трите пелагониски општини ќе заврши на 8 јуни.