Половина милион долари се инвестирани во изградба на систем за управување со отпадни води во село Наколец на брегот на Преспанското Езеро, кој ќе биде пуштен денеска во употреба.
Изградени се канализациска мрежа со должина од 4,2 километри и современа пречистителна станица, со што се овозможува безбедно зафаќање и ефикасен третман на отпадните води од ова крајбрежно населено место. На тој начин, се придонесува кон заштитата на Преспанското Езеро и се подобрува и квалитетот на живот на локалното население.
Средствата за инвестицијата се обезбедени од Швајцарската агенција за развој и соработка и Глобалниот фонд за животна средина (ГЕФ) во рамки на проектот за заштита на Преспанското Езеро. Општината Ресен и Министерството за животна средина и просторно планирање го спроведува проектот со техничка поддршка на УНДП.
На пуштањето во употреба на новиот систем е најавено присуство на министерот за животна средина и просторно планирање Нурхан Изаири, постојаниот претставник на УНДП, Луиза Винтон и градоначалникот на Општина Ресен Ѓоко Стрезовски.