Центарот за управување со кризи да не се третира како монета за партиско поткусурување, да се врати избришаното од Законот за управување со кризи дека за директор на ЦУК се бира лице кое најмалку шест години работело во сферата на одбраната и безбедноста, односно кризниот менаџмент и да престане разместувањето на професионални кадри, кои се независни, достоинствени, образовани (магистри и доктори на науки), потврдени професионалнo и во доменот на кризниот менаџмент и на домашно и на меѓународно поле.
Ова денеска го истакна претседателот на Синдикатот на вработените во Центарот за управување со кризи на Владата, Илија Бојаровски, кој рече дека треба да се престане со „упатување“ (вид на некакво решение за работа без цврсто законско покритие) на кое било место „во функција и за добро на ЦУК и државата“, да се почне со редовно унапредување на кадрите во ЦУК, според Закон, во повисоки звања, без партиски влијанија и да се воспостави дијалог со состаноци и комуникација со Синдикатот за заштита на правата.
Додаде дека досега како Синдикат од ЦУК двапати во 12 години реагираат јавно за заштита на правата, професионалноста, кариерата и стандардот во нивната работна средина.