Кандидатот за претседател, Гордана Сиљановска-Давкова, коментирајќи ги случаите со антикорупциската комисија за непотизам и повикот на премиерот Зоран Заев за повлекување на роднините на функционерите рече дека не гледа искрена намера кај власта за чистење на нефункционалчните кадри и справување со корупцијата.
„Ако метлата на Заев метеше како што треба, не знам досега колку рачки ќе се искршеа. Напротив не гледам ниту една. Згора на сѐ, шефот на изборниот штаб на мојот противкандидат е една од иконите во фамилијарните вработувања. Пораката што ја испраќаат е загрижувачка, а јас сум шокирана. Ова што се прави нема ништо заедничко со европските вредности, по ова што го гледаме изгледа дека политичкото ткиво е длабоко инфицирано“, рече Сиљановска-Давкова.
Таа беше прашана и како ги оценува двата мандати на Ѓорге Иванов и дали тој треба да биде предмет на истрага за недомаќинско трошење на пари. Сиљановска рече дека тоа е прашање со кое треба да се позанимаваат институциите.
„Дали купувал кравати или нешто друго и трошел ненаменски, јас тоа не го знам и не е во моја надлежност јас да вршам истрага, но, доколку има недомаќинско трошење на пари секогаш ќе бидам критички настроена и како иден претаседател ќе го кревам мојот глас и ќе алармирам за тоа“, рече Сиљановска.
Габриела Димковиќ-Мишевска