Поранешниот државен јавен обвинител, Љупчо Шврговски, за обвинителката околу која се согласија партиите да ја извршува функцијата на „прогонувач“ на инкриминираните владини функционери, вели дека е професионална и стручна. Катица Јанева е избрана за јавен обвинител во Гевгелија во времето кога Шврговски ја извршуваше функцијата државен јавен обвинител.
-Ја познавам колешката. Коректна е, професионална и одговорна. Од тие причини сметам дека ќе одговори на потребите. Пред новата организација на обвинителството, надлежноста на гевгелиското обвинителство беше многу експионирана и работеше со сериозни предмети, предмети со голема тежина. Мислам дека искуството кое го поседува е драгоцено и ќе и помогне да се справи со сите предизвици – вели Шврговски.
Сепак Јанева не е позната за голем дел од јавноста и за дел од кулоарите во правосудството. Поранешниот јавен обвинител, Јован Трпеноски, вели дека специјалниот јавен обвинител треба да биде упорен и многу енергичен, но додава дека 13-годишното искуство на Јанева е доволно за да одговори на задачата.
-Не ја познава, но во 2003 како што дознавме е избрана за заменик обвинител во Гевгелија. 13 години е доволно за кадар од јавно обвинителство кој се судрил со доста интересни и тешки предмети. Сепак Гевгелија е подрачје каде има интересни случаи. Се друго е субјективно и зависи колку ќе биде упорна и стручна. Сакам да има успех во работата, не и завидувам затоа што е тоа тешка функција, многу одговорна, функција во која најголемиот притисок доаѓа од личната одговорноста за утврдување на реалната вистина – вели Трпеноски.
Според партиски извори именувањето на Јанева е директен предлог на олеснувачите во преговорите, но партиите имале и свои предлози за специјален јавен обвинител. Трпеноски вели дека функцијата е сериозна и многу одговорна во ситуација на политичка криза и очекува канцеларијата на обвинителот да не биде мета на политички притисоци.
-Очекувам дека ќе работи независно, очекувам од секој што мислел да влијае до сега врз обвинителството и врз судот сега сам да се преиспита и да се повлече. Многу е дискутирано, многу е очигледно присуството на политичката во судството и сега е време политката да се дистанцира – додава тој.
По вчерашните преговори доцна во ноќта каде освен името на обвинителот беше договорен и законот кој ќе го регулира ова прашање, денес во Собрание тоа треба да се верификува. Медиумите за Јанева дознаа дека потекнува од семејство на познат судија, кој бил и претседател на основниот суд во Гевгелија. Ќерка е на гевгелискиот судија Делеџаков.
За заменик обвинител во Гевгелија е избрана 2003-та година, а минатата година е реизбрана на функцијата Обвинител во гевгелиското обвинителство.
Маја Васева