Швајцарија преку Швајцарската агенција за развој и соработка обезбеди пет милиони швајцарски франци за реализација на проектот за еко-системот на Преспанското Езеро.
Проектот ќе се спроведува во наредните шест години од страна на Програмата за развој на Обединетите нации (УНДП) во соработка со Министерството за животна средина и просторно планирање и Општина Ресен.
За таа цел денеска во МЖСПП беше потпишан Меморандум за соработка од страна на министерот за животна средина и просторно планирање Абдилаќим Адеми и амбасадорот на Швајцарија Стефано Лазарото.
– Преспа стана пример за регион кој активно се залага за зајакнување на природните вредности преку спроведување на бројни позитивни иницијативи. Новиот проект се надоградува на претходните резултати и има потенцијал да донесе бројни придобивки за одржлив развој на езерото и на целиот регион, истакна министерот Адеми по потпишувањето на Меморандумот.
Швајцарскиот амбасадор појасни дека ќе ги поддржат мерките со кои ќе се подобри квалитетот на езерото и оти ќе обезбедат и поддршка за подобрување на квалитетот на јавната администрација.
Проектот содржи и компонента со која ќе се обезбеди поддршка на Министерството за животна средина и просторно планирање во спроведувањето на Законот за води. Идејата е да се ангажира на долгорочна основа советник кој ќе помогне во подобрување на спроведувањето на законот.