Од денеска вработените во прилепската наменска фабрика „Еурокомпозит“ стапија во штрајк барајќи да им се исплати септемвриската плата и да се направи динамика на исплата на заостанатите плати и придонеси.
Според Трајче Стојаноски, претседател на основната синдикална организација работен ангажман имаат, но плата не добиваат.
– Денеска донесовме одлука да стапиме во штрајк. Бараме веднаш да ни се исплати септемвриската плата, да се направи динамика на исплата на две редовни и две заостанати плати заклучно со 25 декември оваа година, вели Стојаноски.
Вработените имаат 9 заостанати плати и бараат да им се исплатат и придонесите неисплатани од јуни 2012 година.
Според Стојаноски, од раководството на наменската фабрика „Еурокомпозит“, каде се вработени близу 300 работници, имало најави до петок да се исплати септемвриската плата, но тие чекаат потврда на тоа.
Наменската фабрика „Еурокомпозит“ е еден од загубарите и целосно е во државна сопственост. Досега имаше повеќе тендери за продажба на фавриката. Оттаму потврдуваат дека имаат работа и договорени испораки на производи.
– Има работа, но нема исплата на плати. Сакаме да ни се плати трудот, вели Стојаноски.