Со едукација и посета на противпожарната единица од страна на децата од градинките и училиштата во општините Штип и Карбинци почнува одбележувањето на Денот на пожарникарите.
Командирот на ТППЕ-Штип, Тони Атанасов на денешната прес-конференција истакна дека учениците и децата од градинките ќе видат и дел од опремата со која пожарникарите ги гаснат огнените стихии. Во рамките на противпожарната единица ќе се отвори и соба, во која ќе биде презентиран опремата на пожарникарите.
– Преку оваа поставка ќе настојуваме да ја покажеме историјата на пожарникарството во Штип. Нашите сограѓани знаат дека е оформена 1923 година, од кога имаме и соодветни оригинални слики, токму од тој период, а на кои се и основачите на територијалната противпожарна единица. Во магацините на единицата најдовме и некои од постарите одела, пумпи, кои ќе ги покажеме на дечињата, вели Атанасов.
Во моментов ТППЕ-Штип располага со пет противпожарни возила и едно теренско возило.
