Штипските ловџии се подготвуваат за старот на сезоната за отсрел на крупен дивеч. Сезоната ќе ја почнат со хајка за диви свињи поради реакцијата на земјоделците од лакавичкиот регион за направените штети.
Николче Малинов од Ловното здружение „Ловец“ – Штип вели дека веќе имаат и најава дека во оваа хајка ќе се вклучат околу стотина ловџии поделени во 10 групи, а ќе се лови на терените на Плачковица и кај селото Драгоево.
– Сезоната за лов на крупен дивеч, зајак и еребица ќе се отвори на 7 октомври. Ловот ќе биде како хајка само на дива свиња. Дозволите ќе можат да се вадат на лице место во село Драгоево и во Ловниот дом во Вртешка на планината Плачковица, вели Малинов.
Тој информира дека до наредната година ќе биде и целосно изграден ловниот дом во селото Судиќ, а за кого голем интерес има и од страна на странските ловци, кои на овие терени доаѓаат да ловат прелетен дивеч.
