На иницијатива на градоначалникот на Општина Штип Илчо Захариев денеска на 1.000 граѓани во центарот на градот им беше поделен половина тон вода, по половина литар на човек.
– Тоа е само мал придонес, но пораката е многу посилна, дека луѓето мора да внимаваат на сопственото здравје, да го чуваат и негуваат, бидејќи тие се најодговорни. Ако се придржуваат на советите на сопствените лекари и ако примаат терапија, нема да имаме последици од ова тешко време, изјави Захариев.
Директорот на ЈП „Исар“ Ангел Бојаџиев рече дека високите температури изминативе пет дена ја зголемија потрошувачката на вода во градот за 10 отсто. Комуналното претпријатие е подготвено да одговори на потребите на граѓаните.
– Рестрикција нема да има зашто наша обврска е на граѓаните да им дистрибуираме здрава вода и навремено снабдување до нивните домови, истакна Бојаџиев и додаде дека најголемата потрошувачка се бележи во попладневните часови.
