Градоначалникот на Општина Штип, Зоран Алексов денеска го посети првото родено бебе во Клиничката болница-Штип.
Малиот Матеј е првородено бебе на неговите родители. Мајката Аијола Лазарова вели дека е пресреќна што нејзиното бебе е првото кое се родило во источна Македонија. Лазарова (31) е од албанскиот град Каваја.Пред една година се омажила и со својот сопруг живеат во радовишкото село Дамјан.
Градоначалникот Алексов и ги врачи подароците за малиот Матеј на неговата мајка, а вели дека по првото машко родено бебе, но и по бројот на родени деца во штипското родилиште покажува дека 2013 година ќе биде бериќетна.
– Овде на акушерското одделение за едно деноноќие се родени шест бебиња, што можам да кажам дека ваков почеток на годината и не сме имале одамна, пријатна е и веста дека минатата година за 20 отсто е зголем бројот на новородени деца, рече Алексов.
Началникот на Одделението за гинекологија и акушерство во Клиничка болница-Штип, Стаменка Јанкуловска вели дека во Новата година веќе имаат пет машки и едно женско бебе.