Штипското комунално претпријатие „Исар“ од денеска почна со акцијата за исклучување од водоводната мрежа на фирмите и домаќинствата, кои не си ги платиле сметките, а претходно добиле опомена. Раководителот на работната единица „Водовод и канализација“, Бранко Горгиев вели дека денеска од водоводната мрежа исклучуваат десетина приватни фирми, но и државни институции, чиј вкупен долг изнесува околу 50.000 евра.
– Согласно Законот за водоснабдување, исклучување следува за повеќе од две неплатени сметки, иако во практика не го правиме тоа. Никогаш не сме исклучиле некого за неплатени две, три или четири сметки. ЈП „Исар со секоја доставена фактура наведува и износ што корисникот го должи ако таков износ постои, вели Горгиев.
Тој истакна дека оваа мерка ја преземаат, бидејќи граѓаните и фирмите треба да си го платат својот долг за потрошена вода за пиење, а доколку наплатата е лоша претпријатието нема да биде во можност да инвестира во реконструкции на застарени линии, нема да биде во можност да изведува нови водоводни и канализациски мрежи и нема да има средства со кои ќе ги купува потребните материјали, алати, машини и теренски возила со кои се вршат комуналните услуги кон граѓаните и фирмите.
Горгиев апелира граѓаните и фирмите да си ги подмируваат долговите, затоа што наплатата преку судски пат и со извршители значи и дополнителни трошоци.
