Штипското комунално претпријатие „Исар“ деновиве ќе започне со вклучување на населбата „Балканска“ во главниот водоводен систем на градот Штип.
Директорот на ЈП „Исар“, Ангел Бојаџиев на денешната прес-конференција рече дека оваа инвестиција ќе се реализира заедно со општина Штип.
– Цевките за поставување на водоводниот систем на потегот од Филтер станицата до населбата „Балканска“ се набавени и наскоро стартуваме со активностите на терен. Инвестицијата чини околу осум милиони денари, вели Бојаџиев.
Раководителката на штипската Филтер станица, Тања Глигорова нагласи дека таа е подготвена за успешно реализирање на проектот.
– Вода има доволно. Со градежните активностите граѓаните на градот Штип нема да се соочат со рестрикции на водата за пиење, вели Глигорова.
По зарвшувањето на овој голем проект, во градскиот водоводен систем ќе бидат приклучени и жителите од населбите Чардаклија и Населје, кои со вода за пиење се снабдуваат од водоводот на поранешниот Текстилен комбинат „Македонка“.