Антонио Милошоски призна дека разговорите од „бомбите“ не се монтирани. Вистината е токму во „бомбите“, кога го апсевте Љубе Бошкоски и кога Гордана Јанкуловска и Мартин Протугер, бидејќи им беше малку „нелегално финансирање на кампањата“ договараа да пуштат во јавноста дека Бошкоски наводно го продавал името, рече Радмила Шекеринска.
– Сакате да ја скарате Македонија за да продолжите да крадете. Престанете со лажење, не ги плашете луѓето од она што веќе стои. И Илија Димовски потврди, мајски договор постоеше, а Никола Груевски тука сите не лажеше, рече Шекеринска.
Според неа, ВМРО-ДПМНЕ сака на расипан и подмолен начин да продолжи да лаже, иако во нивните редови има луѓе кои со олеснување ќе очекуваат во Собранието да се дебатира за вистински проблеми.
– За да спасите неколкумина, спремни сте државата да гори, а вашите да се пакуваат и да си одат, вели Шекеринска.
Илија Димовски во контра реплика кажа дека нема ништо лошо ако на крајот излезе дека тие лажеле, иако според него, СДСМ и ДУИ лажат дека нема да има двојазичност.