Пратеничката на СДСМ Радмила Шекеринска денеска учествува на одбележување на 10-годишнината од смртта на поранешната министерка за надворешни работи на Кралството Шведска, Ана Линд.
Настанот насловен „Одржлив развој и човекови права“ го отвори претседателот на Социјалдемократската партија на Шведска, Стефан Лофен, а на него освен Шекеринска ќе говорат и генералниот секретар на Советот на Европа, Торбјорн Јагланд и поранешниот ЕУ комесар за животна средина, Маргот Валстром, соопшти СДСМ.
Ана Линд беше долгогодишен министер за надворешни работи во Кралството Шведска и еден од потписниците на Спогодбата за стабилизација и асоцијација помеѓу Република Македонија и Европската унија, како претседавач на Унијата во 2001 година. Во своето излагање, помеѓу останатото, Шекеринска го истакна овој факт, но и големиот придонес на Ана Линд во надминување на конфликтот од 2001 година во Македонија.