Министерката за одбрана Радмила Шекеринска денеска оствари средба со амбасадорката на Република Хрватска во Република Македонија Данијела Баришиќ на која била истакната одличната билатерална соработка и потврдено дека таа ќе продолжи по истата линија.
Како што соопштија од Министерството за одбрана министерката упатила благодарност за досегашната поддршка и ја уверила амбасадорката дека стратешката цел ќе биде остварена, преку реализирање на вистинските реформи.
– Наша цел е да ги искористиме вашите искуства за реформи, професионализација, модернизација, и се надеваме дека таа поддршка ќе ја добиеме од вас, истакнала Шекеринска на средбата.
Македонија, според амбасадорката Баришиќ, ја има поддршката од Хрватска во остварувањето на стратешките цели, членство во НАТО и ЕУ. Таа изразила уверување дека реформите во Македонија ќе бидат реализирани што ќе биде од корист за целиот регион.
На средбата присуствувала и одбранбеното аташе на Република Хрватска во Република Македонија полковник Маријана Плеша Чадониќ која ги пренела честитките од министерот за одбрана на Хрватска, Дамир Крстичевиќ за назначувањето и пораката за поддршката на Хрватска дека ќе стори сè што е во нејзина моќ да и помогне на Македонија во остварување на нејзината цел.