Денеска околу илјада деца продефилираа долж булеварот Партизански Одреди, закитени со своите шарени цветови на глава, но и со круни, чадори, и весели фустанчиња, во чест на големиот празник 3 ноември – Денот на Општина Карпош.
Цветното дефиле, кое секоја година се одржува по повод роденденот на Општината, оваа година беше преточено во вистинска есенска слика. Детскиот џагор и насмевки го наполнија плоштадот „Делфина“ во Влае, каде всушност стартуваше традиционалната манифестација „Цветно дефиле“.
Градоначалникот, Стевчо Јакимовски ги поздрави најмладите жители на Општината и им призна на децата дека оваа манифестација му е една од најважните и најмилите настани кои ги организира локалната самоуправа.
– Ова цветно дефиле го прават нашите најмлади жители, децата од градинките и од основните училишта на територија на општина Карпош. Ова е повод тие да се претстават со достигнувањата кои ги имаат во образованието, културата, рециталот и воедно да го прослават роденденот на Општината. Тие, од најмала возраст, знаат дека се припадници на општина Карпош и дека нивната општина слави 38-години од своето постоење.
Децата и вработените од градинката „Орце Николов“, го честитаа роденденот на општина Карпош и со подарок, уметнички дела-цртежи ја збогатија општинската библиотека. Подарокот му го врачија на градоначалникот Стевчо Јакимовски и претседателот на Советот, Сашо Лазаревски.
Присутните родители, наставници, основци и децата од претшколската возраст ги забавуваа, културните уметници од КУД „Цветан Димов“, а можеше да се ужува и во балетска точка, како и да се слушне златниот глас на Карпош, Ангелина Спасовска. Чествувањето на роденденот, најмладите од градинката „Распеана младост“ го заокружија со песничката за другарството.